XVIII Premios de Cuentos Curtios El Garrapiellu

La Tertulia Cultural El Garrapiellu n’otra edición más convoca los XVIII Premios de Cuentos Curtios El Garrapiellu.

Los premios que fallaranse’l 10 de payares en Xixón van ser el cumal d’un añu enllenu d’actividaes, charres como les de la cultura castreña con gran asistencia de públicu y la excursión a dellos castros del occidente asturianu, la marcha a Cuadonga que facia los quince años d’esta conocía ruta andariega, el I Certamen de Redaiciones pa Escolinos, amás nun puen dexase a un llau los xuegos y deportes tradicionales asturianos que tuvieron presentes en bien de fiestes del Conceyu Xixón.

El plazu d’entrega de trabayos pa esti premiu de Cuentos Curtios fina’l 22 d’ochobre y los rellatos han d’unviase a TERTULIA CULTURAL EL GARRAPIELLU, apartáu de correos 8133 – 33280 Xixón. El primer premiu ta dotáu con 900 €, el segundu va llevar 300 €.

BASES DEL PREMIU

XVIII CONCURSU DE CUENTOS CURTIOS “EL GARRAPIELLU”

LA TERTULIA CULTURAL EL GARRAPIELLU CONVOCA’L XVIII CONCURSU DE CUENTOS CURTIOS EL GARRAPIELLU

BASES

• Los cuentos han de tar redactaos dafechu en Llingua Asturiana, respetando les normes ortográfiques de l’ALLA
• El concursu va empobináu a escritores mayores de 16 años.
• El llargor de los trabayos (unu por persona) nun será enxamás superior a les 12 fueyes mecanografíaes a doble espaciu, escrites per una sola cara.
• La temática ye llibre.
• El plazu d’entrega de los trabayos tará abiertu hasta’l 22 d’ochobre de 2009 y tienen d’unviase a: TERTULIA CULTURAL EL GARRAPIELLU, apartáu de correos 8133 – 33280 Xixón, nun sobre onde s’escribirá “XVIII Concursu de Cuentos Curtios EL GARRAPIELLU”. Dientro del mesmu dirá l’orixinal del cuentu col titulu y TRES copies, baxo plica, amás d’otru sobre cola plica’l autor y el títulu del cuentu escritu per fora, que contendrá los sos datos y un teléfonu de contactu.
• El fallu’l concursu sedrá’l día 10 de payares. EL GARRAPIELLU nomará un xuráu debidamente cualificáu pa fallar estos premios y les sos decisiones nun serán retrucaes.
• La entrega de los premios comunicaráse personalmente a los ganadores y faráse público nos medios de comunicación.
• A xuiciu de la Tertulia Cultural El Garrapiellu, el ganador de la presente edición formará parte del xuráu del próximu concursu.
• Los trabayos premiaos son propiedá d’EL GARRAPIELLU que los espublizará nel IV volumen de Cuentos Curtios. En dengún casu se tornarán los orixinales a los autores de les obres non premiaes, pero éstos podrán, pela so parte, facer usu de les copies nun presentaes.

PREMIOS

Establécense los premios siguientes:

• 1 Premiu de 900 Euros y diploma
  
• 1 Accésit de 300 Euros y diploma

A xuiciu del xuráu estos premios podrán declarase desiertos

Tertulia Cultural EL GARRAPIELLU. Tfnu: 609-82 40 32

premiu.elgarrapiellu@yahoo.es