jueves, 29 de diciembre de 2011

Entrevista con Pablo Rodríguez Alonso

1) Bones Pablo. Lo primero date les gracies por brindate a esta entrevista. De pasu felicítate pol accésti del XX Concursu de Cuentos Curtios El Garrapiellu. ¿Cuándo unviasti’l relatu contabes daqué?

Contaba con que-y prestara al xuráu y asina pudiere lleelu más xente si yera escoyíu. Naguo por qu’entretenga a los llectores. Esi ye l’oxetivu.

2) El títulu del cuentu ye “Vae Victis”. ¿En qué te basasti? ¿Cómo se t’ocurrió la idea?

El títulu ye una perconocida espresión llatina y qu’apaez nel relatu. Ye un relatu basáu nes epístoles que se manden dos personaxes pente les cuales traten de detener una conspiración política.

3) ¿Emplegues l’asturianu na to vida diaria? ¿Camientes qu’anguaño pónense pilancos pa facer la vida na llingua’l país?

Sí, claro. Uso a vegaes l’asturianu, otres el castellán y otres tantes amiesto les dos llingües. Escribo amás nos dos idiomes. Naturalmente qu’hai pilancos, enforma nos ámbitos formales y alministrativos. Les coses van cambiando poquitín a pocu pa meyor. Tamién los propios falantes ponémonos “pilancos mentales” a la hora d’usar l’idioma en según qué circunstancies. L’estigma llingüísticu ta mui presente entá, pero ye muncho menos perceptible yes xeneraciones más moces afortunadamente.

4) Llicenciáu en Xeografía y Hestoria. ¿Una solución que nun s’esbarrumble‘l patrimoniu material ya inmaterial asturianu mirando al pasáu?

Concenciar. Pueden dase munches perres, idease proyectos ambiciosos, pero si la xente nun quier, nada va conservase. Porque son les persones les depositaries del patrimoniu inmaterial y les poseedores del patrimoniu material. Hai qu’algamar que caún de nosotros pensemos: “heredé toa esta cultura, ye la mia y tengo de tresmitila nes meyores condiciones posibles a les siguiente xeneraciones, como fixeron conmigo”. Nesto tamién avanzóse bastante nes últimes décades. Y neso l’asturianismu cultural tuvo muncho que ver, por cierto.

5) Nesti tiempu de crisis ¿De ser l’asturianu llingua oficial valdría cómo motor económicu xenerador de riqueza y emplegu? ¿O cómo dizse en delles estayes de la sociedá asturiana sedría pa gastar más dineru ensin nengún beneficiu?

Ye evidente que sí, tenemos los exemplos de países cercanos como Cataluña, País Vascu o Galicia. Elli existe una potente industria cultural nos sos idiomes (particularmente nos países de llingua catalana) y nun paez qu’eso supusiere la ruina económica. Protexer la to propia llingua ye una inversión, non un gastu.

6) ¿Qu’opines de l’actitú política pa cola llingua asturiana del gobiernu del Principáu? ¿Si lu comparamos col anterior del Partíu Socialista?

Ye entá pronto pa valóralo. Vense xestos, ye verdá. Pero tamién ye verdá que’l discursu de “desarrollu de la llei d’usu” ye lo mesmo que dicien PSOE-IU nos últimos años, y el resultáu foi decepcionante. Nun duldo por supuestu de la bona voluntá d’asturianistes como Vallaure o Rubiera, pero tengo la impresión que son dos gotes d’orbayu nun mar d’indiferencia pa col asturianu. Y eso que Foro poco tien que facer pa meyorar la política llingüística precedente.

7) ¿Cuerre peligru la llingua asturiana ensin oficialidá? ¿La oficialidá, pa ti, implica la obligación de deprender l’asturianu?

La llingua asturiana correría peligru siendo incluso oficial, asina qu’imaxinate ensin ella. La oficialidá ye requisitu necesariu ya imprescindible pero non suficiente pa la so supervivencia. La oficialidá implicaría introducir progresivamente les mesmes obligaciones que tenemos agora col castellán. Porque la igualdá reside nos mesmos derechos y obligaciones pa cada individuu, sia castellanofalante o asturfalante.

8) Andecha, Pas, Uras, Cna, Ensame, Bloque por Asturies y otros tantos partíos del calter asturianista ñacíos magar los años 80. Nengún sacó gran cosa quitando’l PAS un escañu y Bloque un cachín de poder gracies a tar en comuña con Izquierda Xunida. ¿Qué fizo bien Foru pa que llegare al poder con tan pocu tiempu de vida? ¿Cómo ves la cosa de que tean bien dellos asturianistes de vieyu alcuñu dientro del partíu de Cascos?

Bueno, de los partíos que cites pondría en cuarentena a URAS como proyectu asturianista, y en tou casu foi circunstancial y de recorríu curtíu, consecuencia d’unes circunstancies concretes. Y repective a Foro desde llueu nun pueden comparase los sos entamos ideolóxicos con nengún de los que cites, por cuenta que la ideoloxía de Foro ye la de Cascos. Foro ye la voluntá de Cascos y poco más. Ñació como un proyectu personalista que se nutrió de les bases de la derecha asturiana y de ciertos sectores de la población fartos del bipartidismu PP-PSOE (IU). El retu de Foro ye triar un camín coherente y saber si va ser quien de tener continuidá nel tiempu o va aguantar lo qu’aguante Cascos al frente.


En cuantes a la presencia d’asturianistes nes sos files, parto de la base d’un asturianismu sinceru y demostráu a lo llargu del tiempu d’eses persones, y toi seguru que creen sinceramente que Foro ye una bona ferramienta p’actuar na consecución d’oxetivos que meyoren el país. Nesi aspectu tienen tol respetu. Agora bien, nun tomemos la parte pequeña pol too. Qu’haya asturianistes en Foro nun lo convierte nun partíu asturianista. Un datu a tener en cuenta ye que si nos preguntamos cuála foi a lo llargu de los 30 últimos años la reivindicación cimera del asturianismu tendremos que responder la oficialidá. Pues bien, de los partíos que me cites na pregunta (sacante Uras) toos lo llevaron como prioridá nel so programa mientres que Foro refuga la oficialidá. ¿Ye asturianista un partíu que refuga la máxima reivindicación histórica del asturianismu cultural y políticu?


9) ¿Cuála ye la to valoración del resultáu salíu de les urnes aquel 22 de mayu? Foru Asturies, ¿asturiasmu o rexonalismu del sieglu XXI?

Fixela nel mio blog al poco de conocese los resultaos, y nella, por resumir, vine a dicir que paezme qu’algo cambió pa que too siga igual. Yera necesariu dafechu aire nuevo nes instituciones asturianes, sacar d’ehí a PSOE y la so muleta (IU), abrir les ventanes y qu’entrase aire nuevo, pero paezme que’l aire qu’entró ye más o menos el mesmu de siempre, solo que vieno d’otra dirección. Espero equivócame pol bien del pueblu asturianu.

Foro, como dixi enantes, nun ye asturianista nin rexonalista, ye casquista, y será lo que Cascos quiera que seya en cada momentu.

10) ¿Cuentes siguir escribiendo y presentándote a concursos? ¿Qué te paez el papel de l’Academia de la Llingua na proteición ya igua de la llingua?

Cuento con ello, ye bueno ponese “a prueba” de xemes en cuando. En cuante al papel de l’ALLA, ye ensin dulda la institución más imprescindible que tenemos anguaño. Ye de lo poco que tenemos estable dientro del asturianismu cultural, tan estráu de proyectos efímeros. Y el so llabor normativizador ye daqué que tien una importancia histórica que creo que nun sabemos valorar na so xusta midida. Colos sos aciertos y errores (qu’algún tendría), l’Academia merez tol mio sofitu y reconocimientu.

11) La llingua asturiana paez que nun llega a bastantes estayes de la sociedá asturiana. ¿Cuála ye la to visión? ¿Fizo la RTPA daqué pola llingua?

Ye verdá que l’asturianu va entrando adulces n’estayes onde enantes nun entraba, pero tamién lo ye que cada vez tenemos menos falantes. Ye como un partíu fútbol, vamos ganando terreno poco a poco, enanchando’l campu, pero quedando ensin xugadores. Y como nel fútbol, sales con 11 pero si quedes con 7 xugadores yá nun hai partíu que valga.

La RTPA ye evidente qu’algo fexo pola llingua: hai una serie d’emisiones n’asturianu qu’enantes nun existíen, y algunes d’elles de bona calidá. Ye xusto reconocelo, pero desde llueu ye insuficiente dafechu. Que nun exista nin un solu informativu n’asturianu ye dalgo que manca la maera. O que les retransmisiones deportives, que tienen muncha audiencia, se faigan en castellán en cuentes de n’asturianu. Pa eso podemos velo en cadenes estatales. El retransmitir fútbol o fórmula 1 namás tendría sentíu si se fixere n’asturianu, que ye lo que te diba diferenciar de les cadenes estatales.

12) ¿Conocíes El Garrapiellu? ¿Qué-y propondríes que ficiere pa la defensa del patrimoniu material ya inmaterial asturianu?

Si, claro, Soi xixonés y El Garrapiellu ye una de les asociaciones más conocíes de la vida cultural xixonesa y asina foi reconocío pol Conceyu cola medalla de plata que-y entregó hai un añu (y aprovecho pa felicitavos por ello). El Garrapiellu ye una entidá que lleva trabayando munchos años, eso indica que se faen bien les coses. Si dalgo tengo que proponer ye, como dicía enantes, en que ente toos incidamos na concienciación de la sociedá. Si ganes la voluntá ciudadana la mitá del camín ta andáu.

domingo, 25 de diciembre de 2011

Covadonga y sus puentes romanos

Una ruta que parte de Soto de Cangas al Real Sitio descubre singulares pasarelas [Más...]

El Real Instituto de Bachillerato Jovellanos recibirá la medalla de oro de la ciudad

El Ayuntamiento concede las medallas de plata a la Fundación Sauce, FAPAS, José Luis Jorcano y Ángeles García, pero no habrá títulos de hijo adoptivo ni predilecto [Más...]

El Garrapiellu pon el nacimientu de La Collá

El domingu día 18, a les 12 la mañana, El Garrapiellu va poner el nacimientu nes ruines de la Ilesia Vieya de San Pedru La Collá, en Siero [Más...]

miércoles, 21 de diciembre de 2011

El Garrapiellu pon a la venta calendarios del añu 2012 al preciu de 2 €.


Porque cha-y una mano al Garrapiellu ye cha-y una mano al Patrimoniu asturianu.



Tan puestos a la venta nel Trisquel de Xixón.
Tamién llamando al 609.824.032 mandamostelu onde mos digas

martes, 29 de noviembre de 2011

Entrevista con Denis Soria. Ganador del XX Concursu de Cuentos Curtios

  1. Bones Denis. Lo primero date les gracies por brindate a esta entrevista. De pasu felicitate pol primer premiu del XX Concursu de Cuentos Curtios El Garrapiellu. ¿Cuándo unviasti’l relatu contabes ganar?
Pa min les gracies tengo que-y les dar al xuráu d’esti XX Concursu y a la propiu Garrapiellu, foi daveres una sospresa tremenda recibir la noticia. Y non, yera dalgo colo que nun cuntaba (y muncho menos el primer premiu). Yo mandé un rellatu, qu’al basame un poco na vida y personaxes del barriu pasélo de cine escribiéndolu, pero que del personalmente nun tenía munches esperances de que pudiere prestar fuera del mio portal.
  1. El títulu del cuentu ye “La Vengación”. ¿En qué te basasti? ¿Cómo se t’ocurrió la idea?
Ensin querer desnudar muncho’l cuentu, a lo llargo d’ésti pue vese que de fondu hai una historia, qu’al igual que la microsociedá del barriu, güel un poco a podre. Asina, la vengación -o’l Karma- pasa de ser una necesidá a convertise nuna posibilidá. L’enquiz de too nun se descubre hasta la última frase y’l títulu acaba por dá-y la coherencia final.
  1. ¿Emplegues l’asturianu na to vida diaria? ¿Camientes qu’anguaño pónense pilancos pa facer la vida na llingua’l país?
Nesti momentu de la mio vida sí, cuasi al cientu por cientu. Anguaño curso una FP na que, olvidando dalguna situación desagradable, hasta agora pudi emplegar l’asturianu en tolos trabayos, exercicios y pruebes, orales y escrites. Ello nun quita, qu’ensin nengún perxuiciu, dacuando emplegue’l castellanu de manera puntual cuando hai dalgún problema de comunicación.
Tamién tengo que dicir que tola mio vida viviera fuera d’Asturies y hasta que regresé –hai unos trés años- nunca pudi emplegalu más allá del ámbitu domésticu.
La situación cambiará cuando alcuentre trabayu de la profesión de la que toi formándome (guía-informador) y obviamente al trabayar de cara a xente de fuera tendré qu’adautame a la situación comunicativa. Sicasí de manera xeneral, nel ámbitu llaboral l’asturianu ta desterráu dafechu. La cosa ye bien cenciella, a nadie se-y ocurriría emplegar l’asturianu nuna entrevista de trabayu si veramente quier consiguir el puestu.
Amás, esmolez la situación de los funcionarios, qu’obligaos a aceutar documentación o a entender l’asturianu contradictoriamente ellos nun tienen drechu a usalu. Ye como si al pasar al funcionariáu dexaren de ser ciudadanos.
De toes formes, facer usu del idioma tovía conlleva una serie de prexuicios, burlles, o males cares, cuando non la negativa o direutamente l’insultu, y nun quiero pensar na situación de los falantes en Lleón. Creo que l’AXA (Aconceyamientu de Xuristes pol Asturianu) pue dar fe de bastantes casos. Por eso mesmo animo a tol mundu a facer la prueba, tar solamente un mes emplegando esclusivamente l’asturianu. Creo qu’ehí sí que l’AXA echaría fumu.
  1. Nes caberes eleiciones municipales fuisti nes llistes de la coalición Bloque-UNA. ¿Tas agora en dalgún proyeutu políticu? ¿Cuála ye la to valoración del resultáu salíu de les urnes aquel 22 de mayu?
Sí efeutivamente, na llista de Xixón. La mio afiliación política siempre foi la esquierda soberanista y como agora independiente, la coalición Bloque-UNA garrémola con munchu entusiasmu, ente otres coses porque trescendía más allá de los dos partíos, aspiraba a integrar a nacionalistes, soberanistes, federalistes, feministes, ecoloxistes, xente de la cai y xente de lo rural, pero dexando claro que toos y toes pertenecíemos a esa esquierda “nacional”.
Pela primer vegada en munchos años tuviemos opciones reales d’algamar representación y foi una campaña perilusionante y sacrificada, pero pela primer vegada tamién, alloñada del mal gustu, mui bien plantegada, allegre y apasionante. Lo malo ye que llegó mui poco tiempu enantes de les eleiciones y esi, creo, foi ún de los principales motivos de la falta de la posterior repercusión. Tamién toca dicir que tuviemos peleando segundu a segundu la presencia nos medios, que les más de les veces tentaben silencianos en contra de lo que-yos obligaba la llei eleutoral. Cuido qu’eso también demostró qu’esisitía ciertu miéu a qu’entráremos na Xunta Xeneral pa ponelos pingando.
Cuando dexemos l’alma como interventores o apoderaos nos colexos eleutorales y fuimos a l’hotel a ver los resultaos, creo que nadie s’esperaba’l resultáu de Foro. Anque tábemos toos demasiao frayaos como pa dar muestres de sospresa o dalgún otru tipu de sentimientu.
Caún fexo la so valoración, nenguna meyor nin peor que la otra. Pela mio parte, los resultaos debiéronse a dos principales factores d’influyencia esternes:
El primeru foi la repercusión mediática estatal cola que cuntó Alvarez Cascos. Tamién hai que tener en cuenta que, debío a la falta de consecuencia de la esquierda (consecuencia entendida como la cualidá de ser consecuente cola ideoloxía que representen),  la xente nun entiende bien la dicotomía ente derecha y esquierda. Yá nun quier discursos sesudos, mueve’l votu ente aquéllos que nun contradigan una serie de valires y que pueda entender. Y Foru dió-ylo too en papillina.
Nestos momentos trunfen tamién los discursos valeros y populistes, ello desplicó la xuba de partíos nacionalistes como UPyD, beneficiaos pol mesmu pesu mediáticu.
No que cinca al asturianismu nin s’entiende, nin se conoz una marca estable (neso creo que la culpa ye más del propiu asturianismu). Y la imaxe que los asturianos tienen del nacionalismu o’l soberanismu en xeneral (también por influyencia esterna) nun ye mui amable.
El segundu factor d’influyencia de votu a nivel estatal foi’l 15M. Debío a lo anterior, una parte esencial y importante del votu descontentu con IU en cuenta de treslladase a los partíos minoritarios, sacante dalgunes esceiciones, s’abstuvo o votó nulo. Y llueu taben los votantes tradicionales del PSOE, qu’entendíen a IU como esi votu minoritariu.
Si me refiero al 15M como factor estatal, ye porque n’Asturies esi movimientu nun supo analizar nin entener el fechu diferencial del país, como’l problema de les trés circunscripciones o direutamente la situación antidemocrática de los asturianofalantes y la so falta de reclamación del estatus d’oficialidá, que nun dexa de ser un drechu humanu.  
Hebo munchos compañeros y compañeres deceicionaos o derrotaos tres especular de manera mui pesimista la nuesa entrada nel parllamentu a lo llargo de tola campaña, yo nunca quixi pensar nello (delles hasta mentía p’animanos). Sabía -y sé- qu’esa campaña (o’l resultáu) nun yera lo más importante, lo importante ye que tuviéremos toos d’una pieza dempués del 20M nesi mesmu proyeutu. Lo veramente importante yera creyer que yera importante.
Anguaño, anque fuera d’órbita debío a los estudios, güei sigo aguardando a que’l procesu de converxencia siga’l so cursu y d’ehí sigamos trabayando a partir d’una marca, porque pa nós la campaña eleutoral tien que durar cuatro años.
  1. Nesti tiempu de crisis ¿De ser l’asturianu llingua oficial valdría cómo motor económicu xenerador de riqueza y emplegu? ¿O cómo dizse en delles estayes de la sociedá asturiana sedría pa gastar más dineru ensin nengún beneficiu?
Nadie nun s’escandaliza por rehabilitar y conservar el prerrománicu. Col asturianu asocede igual, la xente tien qu’entender que, dende la oficialidá, el dineru destináu a la normalización y recuperación sedría una inversión de futuru.
Otra historia ye la política de subvenciones que se llevó faciendo hasta agora. Como vieno pescudando Víctor Suárez nel so blogue Fueya en blanco, tase dando decenes de miles d’euros a La Voz de Asturias, a LNE o a El Comercio pa normalizar l’idioma y dempués nun cumplen colo pautao, nin cola toponimia o los resultaos son mui probetayos. Mesmamente editar un calendariu yá ye abondo pa recibir una subvención. Si nun hai control seriu, ésto acaba siendo contraproducente.
Pero ¿Qué pasaría si’l gobiernu asturianu dixera que nun quier recibir fondos mineros por argumentar que nun esisten mines? Pos por ser l’asturianu una llingua non oficial, Asturies dexa de recibir ente 20 y 30 millones d’euros que l’Estáu destina añalmente a la normalización nes comunidaes billingües. ¿Sedría eso abusar muncho de los fondos públicos? Pos esa foi más o menos la mesma cantidá que’l gobiernu asturianu tuvo que volver a tramitar en 2009 por dexar caducar convenios de los fondos mineros. Finalmente nun ye tanto’l dineru qu’empleguemos, sinón el cómo lo empleguemos.
Y pa los que s’enllenen la boca cola rentabilidá de los idiomes ¿Ye rentable’l castellanu? ¿Acasu ye rentable dalgún idioma? Por favor, son ferramientes de comunicación, non máquines tragaperres. Cuando tengo esta comesación bizantina de secute siempre me salten cola relevancia llaboral, de que ye más útil deprender inglés (como si fuere incompatible), que cómo vamos poner a l’asturianu al mesmu nivel. Y anque sone a perogruyu yo-yos respuendo, -poniéndolo-.
Les llingües son útiles onde se falen.  Nesti momentu falar gallegu o catalán ye más útil p’alcontrar trabayu que conocer inglés y nun lo digo yo, dizlo Juan Carlos Moreno Cabrera, que ye caderalgu na Universidá Complutese de Madrid. En cuenta de conocer les llingües –útiles- del so entornu, dalgunes muncho más fáciles de deprender pola so condición de romances, coméncese-y a la xente pa que gaste dineru y tiempu en procurar entender -que non deprender- inglés, o pa que lleve a los fíos a colexos billingües, cuando la realidá ye qu’a la gran mayoría de la población (sacante direutivos o xente que tenga que viaxar o trabayar en contautu con estranxeros) l’inglés o’l chinu nun-yos va servir pa nada. Y eso llámase llaváu de celebru.
  1. ¿Qu’opines de l’actitú política pa cola llingua asturiana del gobiernu del Principáu? ¿Si lu comparamos col anterior del Partíu Socialista?
Anque hebo un cambéu nes formes y tovía tienen cuatro años pa definir bien esa política, hai una renuncia espresa a la oficialidá. Ensin reconocer esi drechu fundamental tolo que faigan van ser parches y retórica. Amás siguen enfotaos n’encuadrar a l’asturianu dientro de la Conseyería de Cultura, cuando’l so usu correspuende a toos. Por exemplu, nun ye normal que si Sanidá quier facer una campaña informativa n’asturianu tenga que tirar del presupuestu de cultura.
Por embargu, pueque yá nun heba una política tan agresiva, como cuando’l PSOE tentó valtar la permínima llei d’usu y promoción pela puerta d’atrás, pero’l llímite propuestu ye’l mesmu. El llímite de la conflictividá social.
Sobre too, pienso que temen a que’l fechu tener –oficialmente- una llingua propia suponga un puxu identitariu demasiao grande como pa beneficiar o derivar nún proyeutu políticu qu’apueste pola vertebración, real, del país. Quiciabes, tamién que surda una oposición social al rodiu de la oficialización. Polo tanto creo que, de dalguna manera, toos tán supeditando l’idioma y los drechos de los sos falantes al simple interés políticu.
  1. ¿Cuerre peligru la llingua asturiana ensin oficialidá? ¿La oficialidá implica la obligación de deprender l’asturianu?
Nun m’alcuerdo ónde nin a quién-y lo escuché, pero ye una frase que define bastante bien la so situación; “l’asturianu muerre con cada xeneración qu’acaba y con cada xeneración que naz”.
Magar, tenemos que tener mui claro que l’asturianu pue desapaecer igualmente tengamos o non la oficialidá si nun se tomen les midíes precises pa salvalu. Ente otres tán; la inmersión llingüística gradual nel enseñu y a tolos niveles (faciéndolu especialmente atrayible pa la mocedá), la presencia nos medios (internet, cine, prensa, radio y televisión), usu tresversal na sociedá (usu preferente nes empreses y instituciones públiques), o la señalización y igua de la toponimia, desterrando les formes bilingües o falsificaes.
Con estes premises ¿pue falase d’imposición? Sí, el deprendelu nun dexaría de ser una imposición pa los funcionarios y pa les nueves xeneraciones. Pero como tamién sedría -y ye- una imposición el deprender el castellanu. Garantizar el conocimientu d’eses dos llingües posibilitaría’l fin del conflictu llingüísticu, dando llibertá a los asturianos, en base a esi conocimientu, pa falar y entender cualquiera d’esos idiomes. ¿O ye más preferible facer un guetu o una reserva india?
Nel casu de los servidores públicos pienso que dominar el castellanu y l’asturianu ye fundamental pa desendolcar apropiadamente’l so trabayu. Si l’alministración nun-y da a esi funcionariu la formación necesaria p’atender correutamente a un falante de cualesquiera d’eses llingües  ¿La culpa ye d’esa alministración o del qu’exerce’l so drechu? ¿O ye que los asturianofalantes nun pagamos impuestos?
  1. Andecha, Pas, Uras, Cna, Ensame, Bloque por Asturies y otros tantos partíos del calter asturianista ñacíos magar los años 80. Nengún sacó gran cosa quitando’l PAS un escañu y Bloque un cachín de poder gracies a tar en comuña con Izquierda Xunida. ¿Qué fizo bien Foru pa que llegare al poder con tan pocu tiempu de vida? ¿Cómo ves la cosa de que tean bien dellos asturianistes de vieyu alcuñu dientro del partíu de Cascos?
Como apunté enantes, Foro y en concretu Álvarez Cascos tuvieron una cobertoria mediática a nivel estatal pergrande, que nun tuvieron los demás partíos del parllamentu asturianu nos cuatro años de llexislatura. Segundo, Álvarez Cascos ye un personaxe carismáticu y que motivó especialmente a una xeneración más vieya y desencantada. Dempués hai qu’entender que siendo una escisión del PP, el capital humanu y económicu pa llevar alantre una campaña ye sustancialmente superior.
Foro ye un partíu asturianu, d’alcuerdu, pero nun ye asturianista. De mano, nun pienso que la so visión de lo que Cascos llama “país” vaya más allá de la Santina, del bollu preñáu y’l “Tócale la gaita”. Ye un discursu cuadonguista y que s’apropia de los tópicos pa falar d’Asturies.
Pueo respetar qu’heba “asturianistes” nesi partíu, xulgar lo que faigan cola so vida nun me correspuende. Pero por favor, que nun mos faigan creyer que Foro ye asturianista, o que dientro les insituciones pue facese más que fuera. Ellos van facer hasta onde-yos dexe la direición del partíu, porque ocupen esos puestos p’atrayer a un votu rexonalista mui concretu.
  1. ¿Cuentes siguir escribiendo y presentándote a concursos? ¿Qué te paez el papel de l’Academia de la Llingua na proteición ya igua de la llingua?
Pueque, too dependerá de si tenga daqué que dicir y escribir. Con esa variable nun siempre se pue cuntar.
En cuantes al papel de l’ALLA, nun tengo más que bones pallabres. Ye una institución d’una llingua que pesie a tar nuna situación mui precaria, ta dafechu adautada al nuesu tiempu. Esto fai que la entienda como la institución científica cimera pa la normalización y normativización del idioma nel so conxuntu. Lo que llamento ye que’esto nun tenga fuercia vinculante pa colos demás territorios onde se fala, siendo válido pa tol dominiu llingüísticu.
  1. La llingua asturiana paez que nun llega a bastantes estayes de la sociedá asturiana. ¿Cuála ye la to visión?
Pa min, nun ye que la llingua nun llegue a munches partes de la sociedá, ye que dexó de llegar. Les xeneraciones más nueves cada vez tán más lloñe del asturianu y tampoco nun hai una tendencia haza’l so prestixu. Ye más, veo de contino a madres “corrixendo” a los guaḥes o ñetos “corrixendo” a les güeles y lo único qu’acaba llegando son mitos y prexuicios, como’l de los bables. Delles quedo ablucáu al comprobar qu’hai quien nun sabe qu’hai una Academia de la Llingua, una normativa, o que nun solo se fala n’Asturies. Pero esta inorancia de lo propio ye una consecuencia de la falta d’oficialidá y d’una normalización seria y valiente.
  1. ¿Conocíes El Garrapiellu? ¿Qué-y propondríes que ficiere pa la defensa del patrimoniu material ya inmaterial asturianu?
Sí conocíalu, la verdá allegrámonos muncho nel mundu del asturianismu cuando recibistis la Medaya de Plata de la ciudá de Xixón, porque foi bien merecida.
Y en cuantes a proponer daqué a El Garrapiellu, yo quédome curtiu d’idees. Personalmente prestóme muncho la ruta pel románicu, que foi una manera mui prestosa de poner en valir el patrimoniu material de Xixón. Y anque pela mio parte sone un poco a cínicu, l’emplegu de les subvenciones faise de manera correuta, porque los concursos lliterarios dán-y prestixu a la llingua. Siguir asina, ye lo que vos propongo.
Denis

martes, 1 de noviembre de 2011

Denis Soria gana'l XX Concursu de Cuentos El Garrapiellu

El xuráu del XX Concursu de Cuentos Curtios El Garrapiellu alcordó declarar ganador el rellatu «La vengación», que resultó ser de Denis Soria Fernández. [Más...]

Denis Soria gana’l XX Concursu de Cuentos Curtios El Garrapiellu

El xuráu del XX Concursu de Cuentos Curtios El Garrapiellu decidió dar el primer premiu a Denis Soria Fernández pol so rellatu ‘La Vengación’. L’accésit foi pa Pablo Rodríguez Alonso pol cuentu ‘Vae victis’. [Más...]

Denis Soria gana’l primer premiu del XX Concursu de cuentos curtios El Garrapiellu

Esta selmana aconceyó’l xuráu del XX Concursu de Cuentos Curtios El Garrapiellu pa fallar los gallardonaos d’esta edición. [Más...]

sábado, 29 de octubre de 2011

Denis Soria gana’l primer premiu del XX Concursu de Cuentos Curtios El Garrapiellu

 

Esta selmana aconceyó’l xuráu del XX Concursu de Cuentos Curtios El Garrapiellu pa fallar los gallardonaos d’esta edición. Dempués d’aldericar en Xixón, llegóse al alcuerdu de declarar ganador al rellatu La Vengación, que resultó ser de Denis Soria Fernández. El primer premiu ta dotáu con 900 euros.
El xuráu decidió, amás, dar un accésit de 300 euros al rellatu Vae victis, de Pablo Rodríguez Alonso.
El xuráu d’esta XX edición taba formáu pol académicu de la llingua D. Vicente García Oliva, pol escritor y ganador de la cabera edición D. Sergio Manuel Buelga Casas, pol escritor y editor Milio Rodríguez Cueto y pol escritor D. José Luis Rendueles.
El xuráu destacó’l bon altor lliterariu algamáu na mayoría de los cuentos. Asina mesmo, causó una perbona impresión la mocedá del ganador del decanu de los concursos de cuentos en llingua asturiana. Que la xente mozo escriba n’asturianu afita nel tiempu y na hestoria la supervivencia de la llingua llariega del país.
El Garrapiellu quier agradecer a tolos participantes que tomaren parte n’esta edición, igualmente presta-y al Garrapiellu agradecer a los miembros del xuráu l’esfuerciu pol pocu tiempo que tuvieron pa lleer les obres participantes.
Tertulia Cultural EL GARRAPIELLU. Tfnu: 609-82 40 32
garrapiellu@gmail.com

martes, 25 de octubre de 2011

El 25 d’ochobre va dase a conocer el ganador del XX Concursu de Cuentos Curtios d’El Garrapiellu

El martes próximu, 25 d’ochobre, va fallase’l XX Concursu de Cuentos Curtios de la Tertulia Cultural El Garrapiellu. Dende la organización tán mui satisfechos pola alta participación d’esta edición del certame, superior a la de los años anteriores. [Más...]

Perbona participación nel concursu de cuentos curtios d’El Garrapiellu

La Tertulia Cultural El Garrapiellu felicitóse al traviés d’una nota de prensa pola alta participación nel concursu añal de cuentos curtios que va fallase’l 25 d’ochobre viniente. [Más...]

domingo, 18 de septiembre de 2011

El Garrapiellu torna a la ruta de los Molinos del Ríu Profundu

Esti día 18 de setiembre la Tertulia Cultural El Garrapiellu va a percorrer la villaviciosina Ruta de los Molinos del Ríu Profundu. [Más..]

sábado, 17 de septiembre de 2011

LA TERTULIA CULTURAL EL GARRAPIELLU DE RUTA MOLIÑERA POR VILLAVICIOSA_

Esti día 18 de setiembre la Tertulia Cultural El Garrapiellu va a percorrer la villaviciosina Ruta de los Molinos del Ríu Profundu. [Más...]

jueves, 15 de septiembre de 2011

Ruta de los Molinos del Riu Profundu




EL GARRAPIELLU MOLIÑERU

Esti día 18 de setiembre la Tertulia Cultural El Garrapiellu va a percorrer la villaviciosina Ruta de los Molinos del Ríu Profundu. Esta ruta de calter etnográficu foi descubierta pol etnógrafu maliayu y miembru d’El Garrapiellu Rafa Balbín.

La ruta que naz en Valbucar y termina en Buslaz percuerre'l fondingon formáu pol Ríu Profundu con paisaxes de plasmu, va tomando distintos nomes según los pueblos pelos que pasa, en 9 km de recorríu atopes 22 molinos en bastante mal estáu, pero que dan idea de lo importante que foi en toa Asturies la "cultura’l pan" como elementu de comunicación ente los pueblos porque fueron bastantes los caminos y siendes que s’abríen pa dir a moler, a la vez tamién desendolcaron la cultura inmaterial, son munchos los cantares, lleendes y tradiciones qu’inda tan na memoria de los pueblos.

Rafa Balbín espublizó un llibru -guía andariega sobre esta ruta: Los molinos del Profundu, editáu por VTP en mayu del 1997. El llibru ye imprescindible pa facer el percorríu y entender la importancia patrimonial que ta a puntu de despaecer.

La Ruta de los Molinos del Ríu Profundu ye ruta habitual de la T.C. El Garrapiellu qu'en collaboración con Rafa, editó un folletu y realizó delles presentaciones, charres, proyeición de diapositives, etc. La ruta yera curiada por esta asociación. Fináu Rafa, auténticu guardián de la ruta, ésta tá cayendo nel escaezu, polo que ye importante revitalizala y pidir al ayuntamientu de Villaviciosa que la cuide.

El puntu d’entamu va ser el Café de Vicente en Villaviciosa al rodiu les 10:30 de la mañana del domingu día 18 de setiembre, n’almorzando los andariegos tiraran al entamu la ruta.

Teléfonos de contautu:

Vicente: 629.776.935

Tino: 606.390.344

sábado, 3 de septiembre de 2011

Abiertu’l plazu pa la venti edición del concursu de cuentos curtios d’El Garrapiellu

Abiertu’l plazu pa la venti edición del concursu de cuentos curtios d’El Garrapiellu

Los premios son de 900 y 300 euros [Más...]

sábado, 16 de julio de 2011

Discursu entrega medaya nel Ayuntamientu Xixón

LA Tertulia Cultural “ EL GARRAPIELLU”
La Tertulia Cultural “El Garrapiellu” siéntese mui honrada pola medaya de plata del Conceyu. Una distinción que fai estensiva a toles asociaciones culturales de la ciudá porque camienta que con ella prémiase a tol asociacionismu de Xixón, que tevo puxu a la fin del franquismu y nun tien anguaño tan bona salú. Matáronlu al institucionalizalo, que ye lo peor que-y pue pasar a un movimientu cultural del pueblu. El Garrapiellu ye namás un exemplu de la sociedá civil asturiana, el méritu que tien ye que lleva 20 años faciendo conciencia d’asturianía.
La Tertulia Cultural naz nel barriu xixonés del Polígonu de Pumarín l’añu 1990 y l’oxetivu yera defender la cultura asturiana. Aniciárase pa 1982, cuando un “garrapiellu” persones enfotaes na cultura d’Asturies axuntóse pa facer país. “Garrapiellu” tien una doble acepción n’asturianu: Un piñu d’ablanes o de xente nuna idega común.
El Garrapiellu sigue la noble tradición hestórica de la Illustración Asturiana: La de les Sociedaes d’Amigos del País qu’emponderaba Xovellanos. Esti añu xovellanista tol mundu lu cita, pero pocos lu imiten nel so exemplu de pensar el progresu del país, la so identidá, la so llingua y tradiciones, como aquella “Academia de Bones Lletres” que pa estudiu del bable proyeutare’l sabiu xixonés.
Toles actividaes de la Tertulia Cultural “El Garrapiellu” foron, son y serán empobinaes a la conocencia, defensa y difusión del patrimoniu asturianu. Asina nacieron les tertulies “Los xueves del Garrapiellu”, nes que falábase con toa normalidá n’asturianu de temes asturianos d’actualidá cultural o social nel desapaecíu Café del Carmen. D’ellí salíen escritos, propuestes, collaboraciones con persones, asociaciones o instituciones…
Eses foron les actividaes, ya inda siguen siéndolo. La xera del Garrapiellu nestos venti años son les denuncies pol abandonu del patrimoniu, la recuperación de tradiciones escaecíes o en peligru d’estinción, les rutes culturales y los premios lliterarios n’asturianu.
Na defensa’l patrimoniu etnográfico y cultural, El Garrapiellu recuperó rutes hestóriques, como la del Camín de Xixón a Cuadonga, que yá lleva 21 ediciones y sigue organizándola tolos meses de xunetu. Ye bien sonada y faenla a lo llargo l’añu unes 15.000 persones. Amás fizo y divulgó otres, como la Ruta del Románicu nel conceyu de Xixón pa poner en valir esti patrimoniu hestóricu-artísticu. Tamién collaboró col so sociu, el malográu Rafael Balbín Loredo (q.e.p.d.), na creación y señalización de la Ruta los Molinos del ríu Profundu nel conceyu de Maliayo (Villaviciosa).
Nel currículu del Garrapiellu son cimeros los deportes y xuegos autóctonos. El Garrapiellu fizo lo imposible por recuperalos cuando taben práuticamente desapaecíos. L’asociación entamó coles Olimpiaes de Deporte Tradicional Asturiano nel añu 1996, en modalidaes p’adultos y neños. Fizo y espublizó xeres d’investigación, amueses n’escueles, fiestes, romeríes, faciendo por crear la Federación de Deporte Tradicional, cuyu primer presidente foi un miembru de la Tertulia: Tino Lozano. Organizó tamién el primer Cursu de Monitores de Deporte Tradicional.
La llingua asturiana ye pal Garrapiellu un patrimoniu amenazáu y enfotóse siempre na so defensa y normalización. El Garrapiellu fala, escribe y piensa n’asturiano y ta pola oficialidá de la llingua asturiana. Trabayó y trabaya pol respetu y reconocencia de la llingua’l país, collaborando cola Academia de la Llingua Asturiana, el Conceyu Abiertu pola Oficialidá, l’Homenaxe a Andrés Solar y llevó la causa hasta la UNESCO, en Bulgaria, l’Añu Internacional de les Llingües, 2008. En Xixón collaboró cola Oficina de Política Llingüística naquel Conseyu Asesor que fizo’l proyeutu d’Ordenances Municipales de la Llingua y dimitió en bloque pola sordera del Equipu de Gobiernu, un aldabonazu a los partíos políticos qu’acasu valió pa que tenga la ciudadanía unes Ordenances, una toponimia y un nome billingüe Gijón/Xixón que -anque les “lletrones” del muelle nun s’enteraren tovía- la normalización llingüística ta siendo exemplar na primer ciudá d’Asturies.
El yá prestixosu Concursu de Cuentos Curtios del Garrapiellu, del que van XIX ediciones, ye un clásicu nos premios lliterarios asturianos y tien espublizao tres volúmenes colos cuentos premiaos. Amás, en collaboración con escueles y colexos fai el Concursu de Redaición pa Escolinos, pa promocionar l’asturianu ente los neños. Y nagüa pola continuidá d’estos premios que bien pocu sofitu necesiten pa que sigan tolos años.
Aveza una llinia d’activismu cultural asturianista que pisa tierra y toma sidra colos paisanos. Coles asociaciones vecinales ta pola defensa’l mediu rural, poles fiestes de prau, poles reivindicaciones de barrios y pueblos del conceyu. Posiciónase pola defensa’l patrimoniu en toa Asturies. Puxó por allevantar los horros de Sietes (Villaviciosa), denunció la destruición de los de San Andrés de los Tacones, manifestóse pola ilesia d’Abamia. Colos Amigos del Texu fizo pola defensa de los árboles cultos, como’l Texu la Collá (Siero), faciendo exposiciones d’arte “El texu, l’arbol d’Asturies” con importantes artistes asturianos, y recuperando la misa de gaita col gaiteru de Veriña (q.e.p.d), Mari Luz Cristóbal Caunedo y el Coleutivu Manuel Fernández de Castro nesti día San Pedru, hasta que’l santu baxó pa la romería’l Pueblu d’Asturies.
A tolos collacios y collacies que pasaron estos años pela asociación, a tola xente amigo de Xixón y d’Asturies quier dedicar El Garrapiellu esta medaya. Y albidrando que’l futuru de les nueses tradiciones ta na mocedá, dedícala n’especial a les neñes y neños, que bien-yos presta qu’esti Ayuntamientu-yos dea medayines na Olimpiada Infantil.
Son venti años creando conciencia, dando la vara y faciendo país. Esta ye la xera y l’estilu del Garrapiellu na defensa de la Cultura Asturiana.

domingo, 10 de julio de 2011

Pedro de Silva apadrinará a Carrillo y Gonzalo Anes, a Rodrigo Rato


La exalcaldesa, Paz Fernández Felgueroso, amadrinará al Puerto de Gijón, que recibirá la Medalla de Oro en el acto del próximo miércoles [Más...]

lunes, 4 de julio de 2011

Una ‘piña’ por lo asturiano

La tertulia El Garrapiellu lleva 23 años en la defensa de la identidad regional

[Más...]

domingo, 3 de julio de 2011

El Garrapiellu torna un añu más a facer el Camín de Xixón a Cuadonga

Otru añu más, l’asociación cultural xixonesa Tertulia Cultural El Garrapiellu prepárase pa facer la perconocía ruta andariega ente Xixón y Cuadonga.

[Más...]

Los ilustres de San Pedro

Carrillo y Rato comparten honores con El Musel, El Garrapiellu, Cabueñes, las autoras Teresa Álvarez y Carmen G. Ojea y los sindicalistas Rozada y Prado Alberdi


[Más...]

miércoles, 29 de junio de 2011

Marcha a Cuadonga 2011


Otru añu más, l’asociación cultural xixonesa Tertulia Cultural El Garrapiellu prepárase pa facer la perconocía ruta andariega ente Xixón y Cuadonga.
Una travesía que nesta asociación vien faciéndose dende va venti años, añu a añu.
Son al rodiu quince mil los andariegos que tolos años, camín de Cuadonga, pasen pelos plasmantes paisaxes que-y dan forma a esta sienda. Sienda que pasu ente pasu percuerre los conceyos asturianos de Xixón, Villaviciosa, Piloña, Parres y Cangues d'Onís.
La ruta Xixón a Cuadonga tien al rodiu de setenta y cinco kilómetros. La marcha entama en Xixón, más concretamente en Deva pa dempués d’unes poques xornaes, polo xeneral faise en dos díes de camín, llégase al santuariu de Cuadonga. Pa ello, hai que siguir les marques que punxo l’Asociación Cultural El Garrapiellu. Éses marques son trisqueles (tamién llamaes garrapiellos), hai dellos llugares onde se punxeron cartelos de madera.
La Tertulia Cultural El Garrapiellu quier poner tamién de manifiestu, el so interés nel sen de da-y un emburrión a esta ruta como posible motor económicu de les fasteres rurales asturianes peles que pasa, atrayendo un turismu secañosu de cultura y paisaxe.
Tamién-y prestaría que valiere como noyu de desendolcu llaboral pa la xente moza, afitando asina población nos amenorgaos pueblos asturianos.
Hai dellos años púnxose, dende El Garrapiellu, munchu enfotu en facer un área recreativa en Sorribes (Piloña) nun llugar bien apegáu al camín que conduz a Parres, pa ello aconceyámonos col Ayuntamientu Piloña. Esti añu, por fin paez qu’entamen les obres, ye por ello que facemos nuesa la idea d’esi llugar onde esparder na ruta que va a Cuadonga
Esta ruta ta abierta a xente de toa triba que quiera facela con nos.
La próxima Marcha a Cuadonga, tendrá llugar los díes 15 - 17 xunetu. Saldráse'l vienres 15 xunetu a les 8:00 de la mañana dende la ponte de piedra de Deva, xunto’l llavaderu.
El preciu ye 80 € pa socios y 85 € pa non socios, incluyi una furgoneta pa chanos un gabitu coles maletes.
Darréu detallase tolo que ta dientro’l preciu:
- Nueches en y cena en Sietes/Anayu y Llames de Parres.
- Almuerzu del domingu en Llames de Parres.
- Autobús de vuelta dende Cuadonga hasta Xixón.
- Coche pa carretar les maletes.
El preciu nun incluye:
- Xintes del mediudía.
- Cena del vienres.
- Almuerzu del sábadu.
Los que teáis interesaos habéis de ponevos en contautu, por favor, col nuesu Presidente Tino Lozano, el so móvil ye: 606.39.03.44, asina acutais plaza.
Otru numberu de teléfonu habilitáu ye: 629176935 (Vicente)
Persona de contautu: Tino Lozano (Presidente d’El Garrapiellu)
Tlf. de contautu: 606.39.03.44


lunes, 7 de febrero de 2011

POLÍTICA, O ARQUEOLOXÍA


POLÍTICA, O ARQUEOLOXÍA




Dende la Tertulia Cultural “El Garrapiellu” falamos pa la opinión pública, la cultura y la sociedá civil asturiano. Ye vezu de la nuestra asociación pronuncianos a la escontra d’aspeutos que torguen, pa la nuestra manera de ver, l’espoxigue de la cultura asturiana. Facémoslo por un deber de ciudadanía y ciñu pa con Asturies. Al envís d’aldericar unes noticies que cinquen a les rellaciones de la Conseyería de Cultura cola arqueoloxía, prúyenos sopelexar la nuestra posición.


Esmolecemos de ver la burocracia y enclín a la militarización en Cultura, que menacien con mudar el muérganu que tenía de curiar pol patrimoniu cultural en cuartel, onde ye obligao dir “pel conductu reglamentariu” y manden la xerarquía o l’obedecimientu ciegu al mandu, más que la intelixencia, la preparación científica y la honradez.


Paez que la ordenanciosa Conseyería, escaeciendo la so primer función, que ye trabayar pola defensa y caltenimientu del patrimoniu, pierde’l tiempu en castigos llaborales a los que nun tean a la orde o nun traguen cola so ideoloxía política. Un comportamientu autoritariu y represivu que nun alienda res un clima afayadizo pa les xeres arqueolóxiques. Encamentámos-yos a que se centren no que-yos vamos evaluar los ciudadanos y ciudadanes nos vinientes procesos elleutorales: la so propia capacidá de xestión de los nuestros bienes culturales.


La Conseyera y el Direutor Xeneral debíen facese dalgo autocrítica. Matar al mensaxeru pa quitase de responsabilidaes nun ye’l camín. La so xestión carauterizóse davezu pol conflictu, l’abandonu de bienes y la incapacidá pa defender el patrimoniu arqueolóxicu, hestorico-artísticu y etnográficu. Y si ye qu’esta abegosa represión da nuncies de nomar la direición del Muséu Arqueolóxicu, reclamamos la llibre concurrencia, ensin maturrangues d’esclusión, respetando drechos y currículos profesionales.


Polo que sabemos del trabayu d’Ángel Villa y l’equipu suyu, los llogros algamaos nel Plan arqueolóxicu del Navia-Eo namás que puen calificase de cimeros pa l’arqueoloxía castreña del noroeste peninsular. Jorge Camino y los sos collaboradores en La Carisa anovaron un territoriu arqueolóxico bien granible pa la hestoria romana y altumedieval d’Asturias. La sociedá asturiana tien una delda colos arqueólogos del Chao Samartín, de Curriechos y El Homón de Faro. Y lo mesmo teníemos de dicir d’otros munchos perbonos arqueólogos y arqueólogues. Persones que mos afalaron a conocer y dar a valir la prehistoria asturiana.


Enrraxona ver cómo afustiguen a los arqueólogos que ficieron escavaciones de rellumu y, en cuenta premialos, tórguenlos pa dir a la gueta d’empleaos más fieles. La virtú siempres recompensada n’Asturies manda-y al porgüeyu político qu’unos arqueólogos asturianos dignos seyan separtaos de les sos funciones y espedientaos. Acasu, porque son arqueólogos de campu, non funcionarios de despachu.


Los despachos y tapuxos d’esa Conseyería tienen nel so haber el casu escandalosu de Pepe el Ferreiro, suplantáu pol arqueólogu del zulu La Campa Torres, con conocencia nenguna d’etnografía, pero con fidelidá probada, los aprendices de constructores del remocicamientu d’Abamia, los impautos ambientales de los dólmenes de la sierra Carondio, el vergoñosu abandonu del prerrománicu, o l’estropiciu de los horros y xacimientos de San Andrés de los Tacones.


Na Conseyería sobren burócrates, enchufaos o falagueros ideolóxicos y falten bonos arqueólogos, de los que Villa y Camino son exemplu. Falten persones comprometíes cola cultura asturiana y sobren mandamases, xefatures inútiles y antiasturianes.


Nagüamos porque la política cultural seya más cultura y menos política. Que se mida la capacidá de los investigadores y non los sos apegos al poder políticu. Que les nuestres instituciones culturales trabayen con enfotu pa que podamos tar argullosos y esfrutar del nuestru bayuroso patrimoniu tolos asturianos y asturianes. Non avergonzanos d’unes escures mazmorres kafkianes, onde l’acosu llaboral, la incapacidá o’l barruntu de corrupción afueguen la nuestra cultura.


Como ciudadanos y ciudadanes que pagamos l’arqueoloxía oficial colos nuestros impuestos, dexigimos responsabilidaes polítiques pol espoliu La Campa Torres, el caciplamientu político del futuru Muséu Arqueolóxicu, el camudamientu de campañes d’escavaciones por campañes de persecuciones arqueolóxiques, y enfín, pol desdexamientu de funciones de la Conseyería de Cultura. Denunciamos el desprestixu de la política cultural n’Asturies.


La Tertulia Cultural “El Garrapiellu” espubliza estes reflesiones y llama a persones y asociaciones culturales a facer en xunto una crítica ciudadana a la Conseyería de Cultura, na defensa del patrimoniu asturianu.


Xixón, 29 de xineru de 2011.

TERTULIA CULTURAL EL GARRAPIELLU