A la puerta'l colexu

Una carga policial a la puerta del cole igual ye una forma nuevo de pedagoxía, un proyeutu esperimental, deportivu, porque dende los movimientos de renovación pedagóxica, aquellos de los 'stage' Freinet y la escuela participativa, avanzóse muncho cola participación de padres nel conseyu escolar. Los drechos del neñu tán emprentaos en papelos perguapos pola Conseyería, malque'l drechu a la educación ye d'aquella manera nos colexos públicos. Equí los rapacinos, unos tán refalfiaos y otros anden escaxinaos, que paez que nun-yos dan tayuelu pa estudiar. Pero presta que na escuela medren los drechos humanos pintaos de colorinos, porque tamos nuna sociedá democrática y toos y toes somos felices cola paz, que ye una palombina.

En Cabueñes nun dan precisamente caramelos a la puerta'l colexu. Ye nidio lo peligroses que son eses retafiles de madres, padres, güeles y güelos llevando los críos, mientres dan a la parpayuela y se manifiesten, porque ponen a les criatures como escudos humanos. A la hora de dir pa escuela armen escandalera con una pancartuca pa protestar escontra'l Principáu que quier meter a los neños de tres a cinco años nuna clas, toos apetiguñaos. De resultes, muyeres escalabraes, un pá deteníu, y too a la vista los rapacinos. Los neños, probinos, lloraben viendo polis malos pegar a papa y mama. Por suerte, l'Hospital de Cabueñes ta ehí pa curar les mancadures cuando trona pa Xixón. La verdá, la imaxe ye fuerte, pero nun hai que facer aspavientos, ye pola escuela moderna, ye pol bien de los escolinos, ye la formación pa la ciudadanía.

Al ciudadanu presu acusárenlu de mangar candáu y pesllar el centru, anque l'home polo menos salvaba de la violencia'l patiu del colexu. Pero los axentes del orde namás cumplieron col so deber, dando madera que ye'l so trabayu. Ye que, en viendo la puerta candada, entrugáron-y a l'autoridá: ¿Qué facemos?... "Despejen la entrada", y ellos ficiéronlo, dexaron aquello llibre nun pis pas. ¿Pa qué andar con miramientos?... Lo meyor ye dir pel atayu a golpes y emburriones. Hala, arreglao. Los guardies nun perdieron los concordantes, dieron unos palos proporcionaos, nun van dexar que los de la AMPA se-yos remonten. Y yá puen dar gracies que nun los llevaron colos fíos pal cuartón. Que vuelvan por otra, que tapen los güeyos a los neños inucentes pa meyor zurrar a los pas. Porque, eso sí, l'enseñu ye de baldre y ta garantizao pola fuerza pública, amás con deportes a los críos, pa que deprendan ceo a dir pelo segao. Dicía-yoslo yo a los collacios d'El Garrapiellu, hai que recuperar la paliestra pa los xuegos tradicionales y, agora que preparen a los neños dende la primaria con unes esperiencies estraescolares tan guapes, facer por metela na Olimpiada Infantil. A min chocábame que cundiera la redaición escolar de los cuentos curtios col tema de les «Cartes a Obama», pero igual ye que nesti Xixón del alma vamos camín de Guantánamo y la represión ye reality show. El señor Riopedre diz que l'atropeyu ye pa salvar el drechu a la escolarización. Un drechu que torguen les asociaciones malones qu'anden fadiando cola pancarta y nun dexen que los neños se-y acerquen cuando arma la bolera y ensaya'l tiru parabólicu. Nesta parábola exemplar Herodes yera un malthusianu, un home que facía por acabar cola masificación de los neños nos colexos.